好多家長一講到 Pre-P1，第一時間可能會諗：「係咪要開始學加減數？」甚至會覺得，小朋友如果喺入小學之前已經識得計三位數加減，就代表數學能力比較好。
的確，運算能力係數學其中一個重要部分，但我覺得 Pre-P1 要學嘅，其實遠遠唔止加加減減。
教學嘅時候，我都見過唔少小朋友，單純做計算題可以做得好快，三位數加減甚至比同齡小朋友快好多。但一去到文字題，情況就完全唔同。有時候題目明明只係簡單嘅加減法，但佢哋會唔知道應該用加法定減法，甚至睇完題目都未必理解緊題目問緊乜。
呢個時候就會發現，原來「識計」同「識數學」其實係兩回事。
如果小朋友只係不斷練習兩/三位數加減，佢可能可以透過重複操練掌握運算方法，但未必真正理解數字之間嘅關係。當題目由一條直接嘅「356 + 127」變成一段文字，要求佢自己分析題目、理解情境，再決定應該用咩方法解答時，就容易出現困難。
所以我覺得 Pre-P1 最重要嘅，未必係追求小朋友提早學到幾多位數嘅加減，而係建立佢哋對數學嘅基本理解。
除咗運算之外，小朋友亦需要慢慢接觸時間、平面圖形、立體圖形、長度、距離等不同課題。例如認識時鐘，唔只係識得背 1 至 12，而係理解時針同分針代表咩；學圖形亦唔只係識得講出正方形、三角形，而係開始觀察圖形有咩特徵。
Pre-P1 嘅階段，其實更加適合讓小朋友建立不同數學概念，而唔係一味追求超前學習。因為去到小學之後，數學唔會只係一堆計算題，而係需要理解、分析同思考。
與其不停問小朋友：「你識唔識計三位數加減？」我反而更加想知道，當遇到一條新題目時，佢有冇能力理解題目？有冇辦法自己分析？知唔知道點樣將生活中嘅問題轉化成數學？
計得快當然係一種能力，但理解數學，先係學習數學更重要嘅一步。
