有時我會諗，做補習老師最有滿足感的時刻，唔一定係見到學生考高分，而係望住佢哋由「唔敢試」到「開始相信自己」。嗰種由內而外的轉變，永遠比任何分數更動人。
建立自信的開始
我喺荃灣官立中學(TSUEN WAN GOVERNMENT SECONDARY SCHOOL, TWGSS)教過一位中三學生A同學。佢的數學成績一直都唔理想，幾乎每次都唔合格。對佢嚟講，數學唔止係難，而係一門「無可能」的學科。第一次上堂，佢仲會邊做題邊歎氣。 我冇即刻俾大量練習佢，而係由最基本的概念開始，一步步拆解佢以前卡住的地方。當佢第一次真正明白某條題目的邏輯時，我會即刻請佢自己試多一條，等佢親身感受到「原來我真係做到」。就係呢啲細細的成功經驗，開始喺佢心入面種下一粒「自信」的種子。 好多時學生唔係唔識，而係唔敢試。當佢每次完成一個小目標，例如成功解答一條以前做錯的題，或者喺quiz入面少咗幾個失分位，比起實際分數，我會更加著重佢的能力，除咗了解自己不足的地方，更需要知道邊部分有成功到。慢慢，自然就會明白成功係可以一個一個累積返嚟。嗰啲一次又一次細微的成功，就好似樓梯咁，級級向上，最後自然帶佢離開「我唔得」的陰影。
自信到自我要求
當自信開始建立之後，學生學習的方式會變晒。A同學由以前避開難題，變成會主動問我點做，呢種主動係我見過最寶貴的轉變。 我開始幫佢的校內quiz建立目標，唔係求滿分，而只求佢能夠完成佢識的內容。第一次拎到60分，我同佢講：「合格其實唔難。」第二次攞到70分，佢竟然話：「我覺得可以再高分啲。」嗰一刻我真係有啲感動——一個學生由「求合格」變成「追求更好」；由外在鼓勵轉為內在推動，呢份自我要求先係真正成長的開始。 呢個過程入面，佢唔單止學識咗數學，仲學識咗點樣面對挑戰、點樣處理挫折。當佢喺之後的測驗入面攞到全班中上成績時，佢唯一的感想就係可以做得更加好，當刻我知道——佢已經唔再需要靠老師推，而係學識咗點樣自己行。
啟發
好多人以為補習就係教技巧、提升成績，但其實更大的意義係啟發學生搵返對學習的熱情。每個學生都有潛能，只要有人願意俾佢多啲信任、多啲機會，佢哋就有可能創造屬於自己的「成績進步」故事。 喺我心目中，A同學已經成功，唔單止因為佢數學上進步，而係因為佢學識咗相信自己的能力，並願意要求自己變得更好。呢種態度，會喺考試以外的人生路上，陪佢行得更遠。
對我嚟講，補習老師唔只係教書，而係陪學生讀書的過程。成績只係結果，信心先係起點；當學生愈嚟愈懂得相信自己，成功自然會隨之而來。
