數學補習名師 – Dicky Sze

  • 香港城市大學數學系(榮譽)學士
  • 多年數學補習、補習社經驗，熟悉小組班形式補習，緊貼最新課程
  • 著重邏輯思維，讓學生真正融會貫通。

我的教學理念:

1. 我唔信「唔係讀數嘅料」

做咗多年補習，我聽得最多嘅一句話係：「我唔係讀數嘅料。」但我從來唔信。 數學就似起樓，地基唔夠深、唔夠穩，上面都起唔得再高 。曾經有個學生成績唔好，話自已「唔係讀數嘅料」。佢嘅問題唔係而家教緊嘅課題，而係某一年課題甩咗，之後愈積愈多，最後放棄埋。花咗啲時間幫佢釐清返之前嘅概念，之後新內容佢自己睇書都明返大半。佢同返我講：「Sir，原來我都係可以嘅 」。

我一直相信：有志者事竟成。搵啱方向，努力先會開花結果——而搵出方向，就係我嘅工作。

2. 操練 ≠ 盲目刷題，而是針對性突破

讀書時期我數學唔算好，唔係唔識，而係粗心大意，喺唔應該嘅位蝕分。當年我恩師用兩招改變咗我。

常犯錯誤簿：粗心唔係撞彩出現，每個人都有自己嘅弱點——有人漏負號，有人睇錯單位，有人抄錯數等等… 將自己重複犯嘅錯逐個記低，就會睇到自己嘅犯錯規律，對症下藥；之後做卷，對照自己嘅錯誤清單逐項檢查，冤枉分即刻少晒。

除錯練習：畀啲做錯咗嘅題目學生，等學生喺老師嘅視角搵出錯處、再改正返。當你識得咁樣審視錯誤，你對做錯會更加有警覺。

攞「5**」唔係識做晒所有題目咁簡單，而係識做嘅題目一分都唔准跌。全港每年攞到「5**」嘅人寥寥可數，幾分之差，就係得同唔得嘅分別。所以喺我嘅課堂，我要求唔係「盡量唔好錯」，而係「唔准錯」。「5**」學生識嘅嘢都差唔多，最後分出高下嘅，係邊個夠穩。

3. 題目每一個字都係線索

我發現好多學生讀題會「睇漏字」，唔覺意走漏咗啲關鍵字眼，結果成條題方向錯晒。其實數學題目冇廢字，每一個字都係出題者畀你嘅線索。所以我會訓練學生逐字讀題、圈起關鍵條件，答完再對返題目要求有冇走漏。

將佢變成習慣，習慣到就算喺考場幾緊張，都會自動自覺咁做。題目讀得準，先至答得準。