作為數學導師的我，經常都會問學生 : 「測驗或考試基本要幾分？ 」 學生一般答 : 「及格啦，六、七十啦！」好似從來都冇聽過「要滿分」，何解呢？以前還是求學階段的我，每次測驗考試都會預估自己要滿分，即使再困難的課題，都要好好溫習或操練，目標不可低於 85 分，此為本人的基本要求，當然間中都會失手，但整體來說都可達標。
好多時都會與學生們分享一下求學時的辛酸 : 以前我高中時選擇了 A.Math (類似現時嘅 M2)，覺得自己數學能力算比較強，應該輕易駕馭得到，誰知第一次測驗就不及格 (生平第一次數學不及格)，感覺甚差，嗰時都有諗過自己是否不適合讀呢科，但調整心態後，跌低就要企返起身，逐步搵方法處理困難的數、操練多啲、思考多啲，最後成績都算係理想。
Sarah，一位中四的學生，數學底子好弱，課題測驗前預估自己及格已經好好，但鼓勵佢處理基本題型時要小心睇題目，公式離不開都係嗰幾條，用代數處理未知數就大約都可以，反覆操練後，測驗攞咗滿分，抵讚。
David，一個中五的學生，M2 問題一大堆，經常唔小心 (錯一個符號就隨時進入死胡同)，有時佢所問嘅問題都真係不想理會，因為實在係太基本了，原則上都係要佢自行思考並改正，有啲麻煩嘅運作，背誦個做法就得，經常都強調 「煩無問題，最怕係難」，操練多咗後，自然得心應手，最後考試滿分，可喜可賀。有趣的是，佢說了一句 :「唔明白點解份卷咁易，其他人都攞唔到滿分！」對於佢嘅囂張，特別要教育佢 「勝不驕 敗不餒」嘅道理！
不是每個學科可與生俱來就識晒，必須經過不斷的學習、鍛鍊、反覆糾正，才可得心應手！各位同學，你或者可能屢戰屢敗，但心態與行動決定一切，只要你屢敗屢戰，高分、甚至滿分，指日可待！
