喺教書嘅過程中，遇到好似 Serena 呢啲學生，真係令我有好深嘅體會。Serena 係一個中三學生，佢喺期中考嗰陣加入咗我嘅補習班。當時，佢因為跟唔上學校進度，連中二嘅基本概念，例如index law同factorizatio都唔識。考試得返 20 幾分，成個人已經放棄咗學習，對自己冇咩信心。佢係俾家長逼過嚟補習，但當時佢心灰意冷，覺得自己點都冇救。
幫佢重建信心同學習方法
其實，成績唔好嘅原因好多時未必係因為「唔聰明」，反而係因為學習方法有問題，或者學校老師嘅教法唔啱佢。所以，我幫Serena由頭開始，重新建立學習嘅信心同方法：
1.量身訂造學習計劃：我幫 Serena 整咗一個逐步嘅學習計劃，將目標分到每個月，咁樣佢可以慢慢見到自己嘅進步，建立返啲信心。
2.分析成績差嘅原因：我同佢講，考得差未必因為笨，好多時係因為學習方法唔啱，或者老師嘅教法同自己唔夾。
3.由被動變主動：一開始係迫佢每堂做功課，幫佢反覆講解啲基礎概念。但當佢見到自己進步咗，我就鼓勵佢自己主動整理錯題，寫「錯題簿」，然後針對性咁去改進。
小努力換大回報
Serena嘅經歷令我更加明白到，高效學習嘅重要性。我哋唔係要學生「死操」大量數學題，而係要佢哋用啱嘅方法，少做啲，但做到最好。對於 Serena 嚟講，真正嘅轉捩點唔係因為佢突然變得「好勤力」，而係佢發現學習係可以自己控制嘅，通過啱嘅方法，可以事半功倍。
由放棄到全班頭五
由一開始嘅被動抗拒，到後來嘅自律自覺，Serena 真係做咗一個好大嘅改變。最終，喺最近嘅大考入面，佢竟然考到全班頭五！見到佢雙眼重新燃起信心同對學習嘅熱誠，我真係好感動。
教學嘅啟發
Serena 呢個故事唔單止係佢嘅成功，亦都令我更加深刻體會到，作為老師嘅責任係咩。我哋唔係淨係教書，而係要幫學生搵到適合佢哋嘅學習方法，重建佢哋對自己嘅信心。其實每個學生都有無限嘅潛力，只要方法啱，努力就唔會白費。
呢段經歷再一次提醒咗我，教育嘅重點唔係死谷，而係啟發學生去搵到最適合自己嘅方法同方向。希望呢個故事可以鼓勵到更多嘅學生同老師，一齊探索點樣用更高效、更醒目嘅方式去學習！
