
喺補習教學嘅生涯裡,我見過唔少能力唔差、平時表現穩定嘅學生,一到正式考試就突然失水準。呢種情況往往唔係知識不足,而係實戰壓力未有充分準備。就讀聖公會曾肇添中學Form 3嘅A同學,正好係呢方面嘅典型例子。
佢本身能力唔差,平時操卷練習時表現得穩陣,解題思路清晰,計數亦都準確。但一到考試,成績就成日同預期有落差。最特別嘅係,好多題目佢都係考試嘅時候唔識,但考完無幾耐,自己就能諗到點做。呢種「考完先知」嘅情況,令我開始留意到問題唔喺知識層面,而係心理同壓力管理。我同佢講:「妳太緊張啦。妳起考場做卷當係平時我同妳計時練習就得㗎啦。」佢聽完之後若有所思。同時我亦提醒佢練習時就要訓練自己「當正式考試」嘅心態,而唔係等到真正入場先至適應壓力。慢慢地,佢開始習慣喺時間限制下保持平穩節奏。之後一次重要測驗,佢雖然仲有少少緊張,但已經明顯比之前冷靜唔少,唔再出現「考完先知」嘅情況。
實戰壓力本身,都係需要刻意準備嘅重要一環。知識可以靠操卷累積,但面對考試時嘅緊張同節奏感,同樣需要反覆練習同適應。無論平時表現幾穩定,如果缺少對壓力嘅準備,就容易喺關鍵時刻失準。重覆嘅練習唔單止係操題目,更係訓練自己適應壓力,保持平常心。當你真正將「考試」變成「另一場計時練習」時,你會發現,自己比想像中更能發揮應有水平。
