早年應考第一屆 DSE 的學生 Tammy，今日已是一位中學的數學老師，萬萬估不到，當年她最弱的學科就是數學，說來真的是一個傳奇。
Tammy 當時過來補習時就讀中二，數學成績真的好差，基本方程唔得、因式分解唔得、證明題目唔得….. 基本上只係識㩒機，其他幾乎就是一張白紙，加上嗰時佢學習態度懶散，教她真的要軟硬兼施，確實幾吃力。花了很長的一段時間，不斷重複又重複地做著相同或類似的題目，每堂時間延長又延長，做到佢開始對住啲題目已做到麻目地說著 “又係你呀”，幾乎合上眼睛已知答案時，校內成績開始有進步，慢慢地由抗拒數學，到接受數學，到後來開始欣賞數學，嗰時係中五，用了差不多三年多的時間，睇住佢慢慢成長，確實感到安慰。
其實中二、中三嗰兩年 Tammy 都係斷斷續續嚟上堂的，有時佢媽媽都會話佢唔想過嚟，覺得我好煩 (無錯，我真係好煩，喺教數嘅同時，又會講下做人道理，重複講完又講，嗰時 Tammy 已經聽到識講返啲道理教返我，叫我好收聲啦….) 後來中四至中六都一直過來上堂，有時甚至加堂，以操練公開試題型為目標，慢慢地，做數速度及準確度都有所提升。
直到公開試快到時，隨口問了 Tammy 一句 : “45 題 MC，你會啱幾多題?”
Tammy : “35 題吧”
我又問 : “如果有 90 題 MC，你又會啱幾多題?”
Tammy : “70 題吧”
我 : “咁點解 45 題唔可以啱到 45 題?!”
Tammy : “……..又好似有道理喎………”
我 (道理上身) : “為何只局限於自己過往嘅所謂經歷，而忽略了一直以來嘅努力？點解沒有全對嘅思維？” 之後嘅校內 mock exam，45 題 MC 啱了 39 題！！DSE 成績攞 5！！
今天作為數學老師的她，又係不厭其煩地將知識及道理灌輸給她的學生，承傳下去。教學就是如此，代代相傳，身教、言教都有其重要性，見到當日嘅學生回饋社會時，內心有著說不出的喜悅。
今日還是學生的你，有思考過未來如何回饋社會嗎？校內考試，n 題 MC 又會啱幾多題？何時開始創造屬於自己的傳奇？
