學數學一定要 Stay Hungry, Stay Foolish。最近教一位小朋友，佢唔知點解莫名其妙咁自信，之後同佢媽咪傾開，先知道原來佢六年班第一次測驗考到 80+，由五年班最後一次考試 60 幾分一下子升到而家 80 幾分，所以佢覺得自己好勁，開始有啲鬆毛鬆翼。一方面我覺得好嬲，一方面又覺得好好笑。
雖然我都好開心，佢進步咗好多，但分析返份卷，其實佢好多題目嘅分數都唔應該失分，於是我就輕輕打擊一下佢啲自信心：「雖然你拎到 80 幾分，但呢幾題都唔應該做錯喎。」一方面希望佢掌握自己邊啲課題仲有不足，另一方面，冇辦法，佢自信心爆棚，要打擊一下。
而家先係小學階段，即使考得唔好，都唔好因為一次失利而灰心。六年班嘅一次考試，只係學習數學過程中好少嘅一部分，未來仲有漫漫長路。對小學生嚟講，呈分試入到邊間中學先至係更加重要嘅里程碑；完成咗呢部份之後，我哋仲有六年後嘅 DSE 或者海外升學。唔好因為一次考試而過度驕傲或者灰心。希望大家喺學習嘅路上 Stay Hungry, Stay Foolish，保持好奇心、唔怕挑戰，慢慢將自己嘅數學能力提升到更高。好長一段嘅道理，道理大家都明，但係係咪個個都可以做到呢？
進入十月尾、十一月頭，又係考試月份，間間學校都開始陸續進行考試測驗，希望大家可以認真溫書，拎到個好成績！
