教學多年，眼見無數學生平時做數就算幾完善都好，測驗考試時都總係掙啲，當然題目的深淺會有影響，而比較大嘅致命傷始終不懂時間控制。
我嘅其中一位學生 Crystal，每堂做數都係慢條斯理，我經常笑說佢過緊退休生活了，佢係做得啱，但就係唔理速度，佢嘅目標就係完成題目就得，其他都唔重要，這致使我幾乎每堂都要講解控制速度嘅重要性，佢都係不作理會，因此 Final exam 時就係因為這樣而做唔晒整份卷，最慘嘅係後面嘅題目本來佢就識得做。
她升讀中六，喺暑假時已給她操練試卷，當時只係做 Section A(1) (即初中題目)，呢部分必須滿分，亦必須快速完成，還記得第一次給她做時，只給了她 15 分鐘，我沒有話佢知時間，夠鐘就收佢卷，佢嗰刻呆咗，話我傻嘅，那有可能會做得到，而我只係繼續不厭其煩要求佢做數要快快快，經過好幾次嘅折磨後，佢終於喺少於 15 分鐘內完成到 section A(1) 了。
公開試又點會輕鬆呀，隨之而來就係訓練 Section A(2)，Crystal 第一次做時就已經識得乖乖地問我時間了，而我給的係 50 分鐘，佢接住就話即平均一題係 10 分鐘…… 錯了錯了，咁樣分配死硬，我要佢先望清楚題目種類，再仔細思考每題嘅所需時間，待她講完後，我先再話佢知其實 1 分係大約用 1-1.5 分鐘處理，咁佢就用了呢個分配，從每細部分考慮時間，最後夠鐘，佢完成到大約八成，話時間好急，冇錯，平時訓練都覺得急，到真正考試時就會更加覺得時間過得好快，始終考試規矩如此，大家都必須訓練以達至完成到呢個考試遊戲。經過多返訓練後，Crystal 做數已經控制到時間了，而準確度都大致可拿捏得到。之後操練 Section B，Crystal 已自動控制時間了，我已經不需再擔心佢呢方面啦。
有好多學生都會話，做得快一定會易錯，事實又確實如此嗎？真係有實際關聯嗎？真正高手，落筆已經正確，不需走回頭路。試問一個醫生做手術可否錯完再改？咁樣好驚啊！即使題目再難，學識分配時間，捨難取易，好好掌握自己嘅節奏，便事半功倍了！
