很多學生以為，數學就是「題海戰術」，每日做百幾題、操Past Paper，就一定可以高分。但現實往往相反：唔少學生做得多卻冇明顯進步，甚至越做越迷失，開始懷疑自己「天生唔叻數學」。我見過太多個案，一開始盲目追求數量，到最後信心崩潰，成績反而倒退。
重複操練的確可以熟悉題型，但出卷背後坐住係一個活生生嘅人嚟，佢哋唔會咁僵硬將書上面嘅題目照搬去考試入面，如果你只係機械式抄答案、背解法，遇到稍為包裝一下的「新變奏」，例如將條件稍改、結合兩個課題，或加埋生活情境，你就會手足無措。
當我們談論操數時，我們在談論什麼？
第一步，係要搞清楚我哋每一節數學堂，每晚操數，其實係做緊啲咩。「學而不思則罔」，不論做題目定係上堂都好，我會建議學生一定要諗深一層，透過表象看本質，例如可以多啲問自己以下問題：呢堂/呢題講嘅方法幾時可以用？每題Examples之間有無內在聯繫？呢題簡單嘅題目可以點樣出得難啲？題目比嘅條件改變咗仲做唔做到？一條難嘅題目點樣一步步變簡單？我容易犯咩錯？
如果有唔明嘅地方一定要搏命諗出嚟，盡量每個概念都理解透徹，呢個時候就唔好怕醜，多主動問問題，畢竟唔識做唔會無面，只會無分。
至於想養成不斷思考呢啲問題嘅習慣，需要學生自己係上堂、溫書嘅過程中有意識地可刻意練習，將數學知識變成一個完整嘅體系。慢慢地，就會感覺有個系統在自己腦中，做到「心中有數」，讀完題目就有個做法寫到出嚟（即使未必啱都好），就為之大功告成。
