喺過去呢個暑假，我所有六年班嘅學生喺溫習分數乘法問題嘅練習上，例如「A 有蘋果 60 個，B 比 A 多 1/2，B 有多少個蘋果？」佢哋嘅答案大多數都係：
60 + 60 x1/2= 90
我都會喺隔離打粒星，表示答案正確，但算式要再重新列過，諗一個更加好嘅方法。基本上每個學生第一次都會問我：「點解我答案啱，你都要我用第二個算式去表示？」
我要強調，呢個列式答案完全正確，但只足夠應付五年班或者基本嘅分數乘法題目。學生用呢個方法，只係把「多多少」直接計算，但對於更複雜或者多層分數基準的題目，佢哋嘅思維未必能自然延伸。
例如六年班的進階題目：「A 有蘋果 60 個，B 比 A 多 1/2，C 比 B 少 1/2，C 有多少個蘋果？」題目與五年班相似，但多咗一個參考對象，形成兩層基準：
- B 的分數基準係 A
- C 的分數基準係 B
好多學生初見呢個題目會混淆，容易直接套用 A 嘅分數基準，或者寫成冗長嘅算式而忽略每層基準嘅邏輯。如果以舊有思維方式列式，算式會係：
(60 + 60 x1/2)- (60 + 60 x1/2)x1/2= 45
雖然答案正確，但步驟冗長，計算過程複雜，容易出錯，而且學生喺解題前已經覺得困難，有抗拒心理。
所以為咗避免出現呢種情況，我會引導學生養成習慣：處理分數文字題時，先釐清分數基準，再計算實數部分。例如計 C，可以用：
60x(60+1/2)x(1-1/2)= 45
呢個方法好處係：
- 邏輯清晰：每層分數基準都明確，唔會搞混。
- 算式簡潔：唔需要冗長步驟，對計數能力稍弱或者容易粗心嘅學生亦容易掌握。
- 建立思維習慣：學生學懂先釐清分數基準再計算，面對更高難度題目唔驚，亦容易延伸到其他類型題目。
兩種方法比較：
- 先處理分數部分再乘回原數：簡潔、清晰、邏輯直觀，思維容易掌握。
- 一步寫長算式：正確但步驟多，對學生容易造成混淆或計錯。
透過呢個例子，我更加肯定：教數學唔只係追求答案正確，而係要幫學生建立可理解、可應用嘅思路，令佢哋面對更高難度題目都唔怕，亦可以更加輕鬆、有效地處理嚟緊嘅呈分試題目。
