應付公開考試，每位學生都有各自的安排，筆者教學多年，見證好多學生在預備公開試的大半年的情況，有些學生可能會勁忙，又有些學生好悠閑 ，你估他們成績又會有幾不同？
Jenny，一位幾聰明，但又超級緊張嘅女生，起初給她上堂時就已經感受到佢過多嘅壓力。佢每事都要盡善盡美，打爛沙盤問到篤 (實際係簡單複雜化)，寫字好用力，我經常都說笑話 “你不是練武呢，不用大力到紙都幾乎穿啦”，但佢應該習慣了，輕力寫反而不自在。之後一直給她溫習 DSE 必考題目，再操練乙部較為多變化嘅題目，佢個人開始進入崩潰狀態，眼壓大到要睇醫生、食藥，起初以為佢係普通眼痛，後來才知係佢太大壓力所致，醫生都有勸佢要放鬆，暫時休息下，但佢話我比太多數佢操練，咁好啦，唯有平時鼓勵佢多些及提醒需分配好時間。最後佢嘅 core math 及 M1 都攞到 5*，順利進入科大。 (感恩一切過後，已經冇再出現眼痛問題)
Alice，另一位輕輕鬆鬆嘅學生，做所有數都輕柔淡定，睇佢做卷又好易做得到，當然較為困難的數要多啲時間思考，有時給她少少指示，佢就可以完成到題目，能做到舉一反三。問到佢平時做數情況，佢係一個好有計劃嘅學生，佢會鐵定跟住自己在暑假已定好的計劃表溫習，我還記得佢那時係安排了逢星期三、五操數，其餘日子除了功課外就不會接觸數學，所以平日問佢數學有否問題時，佢會話當天不屬於數學就不會有問題要問，佢就係這麼有規律的人，亦可能因為這種規律性，見到佢平時好似都無乜壓力，輕鬆學習嘅感覺。最後佢嘅 core math 攞到 5**，順利進入中大。
Amy，介乎以上兩位學生之間，她不算聰明，亦不算勤力，但叫佢做啲咩數，只要佢係有信心的都會完成到，唔熟練嘅問題，都會盡最大能力完成。佢不慌不忙，我都有指引她操練信心最大嘅題目，公開試與校內試不同，校內試真係好睇出卷老師，有啲會出得好淺，有啲就過份地深 (本人認為無意義)，但公開試要照顧好全港考生，所以深淺度及題目變化都係大致上差唔多，只要肯用心操練，基本上成績不會太差。Amy 好乖，即使數學能力未係好好，佢都有聽我勸告如何喺甲(1)、甲(2)爭取最多分數、乙部爭取大約一半分數、選擇題嘅時間分配及技巧運用等等，要明白考試時要捨難取易，喺限定時間內攞到最多分數，Amy 就係用呢個心態持之以恆，最後 core math 考到 4，順利進入城大。
學習及溫習方式人人不同，可以有壓力地做，可以輕鬆應對，總之搵到一個屬於自己的方法就可以，事半功倍，好好規劃，奪星入大學絕對無難度。大家一齊努力！！
