「作為學生的你，有否想過每次測驗或考試可獲取甚麼成績？」呢個問題，本人已經問過無數次，多年前嘅回應，與今時今日嘅回應，可謂大相逕庭。
以前學生們的回應，大多是要考到八成、九成嘅成績，大家同學之間係正向思維，遇強越強，彼此之間都喜歡分享所學或所得著，一齊努力、進步。曾經試過有一次個學生嚟上堂時顯得悶悶不樂，以為佢剛過去的測驗成績不理想，細問之下，佢考到了 95 分，雖然不是第一，但都已經係全班第二，她不甘心於未能完成到一條較為困難的題目而失掉了 5 分。當然，佢對自己的要求都高，而我亦沒有安慰她，只叫她可反省一下，思考一下平時或試前有冇一啲野可做得更好 (其實心底裡已經覺得佢做得好好，好叻女了)
反觀今時今日的學生，普遍的要求都係及格、六七十分咁上下，已經叫做心滿意足。我好明白學生們本身的數學底子偏弱，而導致他們只求較低的目標。對此，確實需花較多時間，培養返他們的數學能力，讓他們可慢慢提升目標，從而感染其他身邊人一齊進步。有時學生不明白一個現象，當他心目中想著考七十分，咁佢可發揮到的就只有七十分，而成績一般都可預見到係低於七十分，呢樣係常掛嘴邊的「思想、行動、結果」，不斷灌輸給學生，雖知此不但影響他們現時的學業，同時亦係他們將來投身社會的一個思維。
Sam，一位 SPC 的學生，剛過來補習時的成績一般，屬於嗰種有六七十分已經可謝天謝地的那種，而我對佢目標當然係要高啲高啲再高啲，每次完成了課堂內容後，都著他思考書內的挑戰題 (佢從來都不會自覺去做，甚至係逃避的)，由起初的逃避，到慢慢嘗試思考，到慢慢可解決到部分位置，信心漸漸增強了，到測驗時目標都自然不同了，而成績也漸趨理想了。
學習不當應只著重分數，但宏大及可預見的目標還是需要有的，行動力亦會因為如此而大大提升，即使一兩次未見成效，但反覆再反覆嘗試後，行動及結果都自當有所改變。相信自己，目標引領你做到更好、更進步的自己。
