我以為: 導師的教學能力與學歷成正比
其實: 沒有最好的導師, 只有適合的導師
喺我讀書既時候, 我十分鍾意睇電視劇。雖然有部分劇集的劇情有誇張成分, 但對我黎講當中有不少的內容對於我的教學有莫大的啟蒙的作用, 其中一套劇集係「尖子攻略」, 內容圍繞由鄧萃雯飾演的補習名師「A神」同由歐陽震華飾演的彭錦秋既故事。
「A神」原本係一個教開傳統名校尖子的中國語文+ 中國歷史的名師, 並且口碑載道, 一直深受學生愛戴。因為各種因縁和合, 佢被迫同彭錦秋合作教授一班學術基礎極弱的「基謹三寶」應付會考。由於「A神」以前主要教授能力中上+有學習動機的學生, 遇到無心機讀書「基謹三寶」佢束手無策。 當佢教基謹三寶「安史之亂」時, 佢既拍檔彭錦秋提醒佢要將課堂變得生動/淺白, 例如安祿山被任命為「節度使」呢件事演繹為做左唐玄宗既「頭馬」(頭號手下)。果然效果非常之好, 成功令「基謹三寶」明白「安史之亂」既來龍去脈。
「尖子攻略」令我反思自己平時教學既用字會唔會太過文縐縐, 說話既方式會唔太催眠, 所以我上堂會嘗試將一啲睇落晦澀難明既數學專業名詞變得淺白, 例如將congruent triangles 講成2個一模一樣既三角形, 目的係令我啲學生更容易明白背後既數學原理。
我入左補教界都已經接近15 年, 都聽過不少學生反映喺日校唔明老師講乜, 事實上佢地口中既老師有著眾人羡慕既亮麗學歷, 有double master , 亦有國際奧林匹克數學金牌得主。呢班老師不但不乏專業知識, 出題目既功力亦令人佩服, 只係佢地無意識到對佢地黎講係common sense 既知識, 對學生黎講係非常艱難。
反然偶然我會見識到有補習界既行家無顯赫既學歷+滿分考試戰績, 但佢地懂得站在學生既角度諗學生既常見錯誤, 並對學生作出針對既指導。我認為正正因為呢種敬業樂業既工作態度, 才值得學生愛戴佢地。
DSE 數學科既考試已經完畢, 祝各位考生心想事成, 成功考到自己理想既成績!!!!!!!
