數學講求邏輯思維，需運用精準的演繹去表達各數學概念，數學能力的高低往往都能從學生的演繹推搞一二，進而可判斷到學生各方面的思考及表達模式。
Kelvin，是一個數學能力平平的學生，基礎數學概念可以，幾何圖形的知識亦恰當，唯獨係不懂演繹，佢只知答案，卻不清楚過程，故此，每次測驗考試都被扣了很多分，始終中學要求，必須清楚表達整個過程。
仔細睇過 Kelvin 的功課或測驗卷，方程表達有問題，而呢個問題都係好多學生常犯的，例如解方程 1 – 2x = 3 時，Kelvin 表達係 -2 = 2x -> -1 = x，呢個答案寫法有咩問題？表面上好似恰當，實際情況係主次不分，x 應該放在左邊 (呢個亦係被扣分嘅其中一個原因)。我經常提醒學生，係 “未知 = 已知”，而不是 “已知 = 未知”，若不改變呢個壞習慣，到高階課題時就會產生大問題了。
除此之外，幾何證明題目亦係出問題，例如對於證明全等三角形時，係有一定嘅嚴格演繹要求 (雖然有好多老師或導師都無理會，我有時睇到都好無奈)。有次 Kelvin 比條證明題我睇，佢話唔清楚邊度出問題，佢老師就話錯，一分都唔俾，覺得老師有心為難，但我睇完後，結論都係一樣，若我係老師都不予分數。此為他的證明方式 :
對於三角形 ABC 及三角形 DEF，
AB = DE (已知)
FD = AC (已知)
EF = CB (已知)
因此，三角形 ABC 全等於 三角形 DEF (SSS)
同學們，發現到以上寫法有咩問題嗎？等號嘅左右方寫法係有要求的，左方就要寫返左方三角形，右方就要寫返右方三角形，兩邊不可隨意換位，再者，點要對點，即 AC = DF，不可寫作 AC = FD。
以上只係 Kelvin 部分課題表達上的問題，還有其他林林總總嘅可怕演繹，每次上堂都不是教授課題知識，而是要不斷又不斷地訓練他的表達方法。起初大家都好吃力，Kelvin 都覺得好痛苦，但日子有功，苦盡甘來，初中時嘅低劣表達，已可慢慢蛻變到於高中時嘅高等有效表達，而喺其他事情嘅交流中，都得見佢合理及有邏輯嘅分析力，為師都感欣慰。
現時就讀大學嘅 Kelvin 都有為中學生補習，佢有時都笑說話明白以往教授他嘅吃力，現在就由他繼續傳承下去了。 同學們，考試將至，要好好操練各課題演繹法，不應在此方面被扣分啊！
