教咗幾年補習，見過唔少學生從畏懼數學到愛上佢嘅轉變。今日想同大家分享我嘅教學心得，尤其係點解學數學咁重要，希望幫到學生揾到學習動力。
先講下學習數學嘅意義。唔少學生問：「學sine cosine有咩用？日常生活又唔使。唔通我以後落街市買餸要用微積分咩。」我會答：「做數同做gym一樣，做gym可以訓練身體，做數可以訓練個腦。」佢訓練邏輯思考同問題解決力。譬如喺AI時代，邏輯清晰先可以分辨真假資訊；工作上，分析數據或面對挑戰，都要靠呢樣能力。「教育係忘咗學校教嘅之後剩下嘅東西」（唔係我講嘅，愛因斯坦講嘅）——數學就係培養獨立思考嘅工具。學生明白咗呢點，就唔再覺得係苦差事，反而主動投入，學習效率自然UP。
教學上，我最重視個性化同互動。唔同學生風格唔同，有啲人鐘意用圖像去理解，有啲人鍾意用數字去理解。我會根據學生嘅需要去調整教材，例如對基礎弱嘅學生，我會用一啲冷笑話去令學生更易入腦，例如點解0次方係等於1，因為A0係單身一個人（試過講完之後靜曬），但學生往往會因為呢啲具玩味性嘅教學而更加易吸收。另一個心得係用生活情境教抽象概念，好似教中一學生Expand，我會叫佢地想像 5(4x+3y）係一個文具套裝，有4支筆3舊擦膠，買5個套裝嘅話會有幾多支筆同擦膠，大部分學生都可以答到我。透過連結現實，再去延伸到數學概念，可以激發學生嘅興趣。
至於學習方法，我建議混合線上線下資源。例如教四心，我會用程式去讓學生對四心有印象化嘅概念，再去教佢地如何運用到計算上。仲有解題反思：做完題目，對完答案發現有錯，唔好急住放低，用錯題本分析錯誤——係概念錯定運算漏？養成習慣，錯誤減半。初中注重形象指導，如畫圖輔助；高中教策略，如數形結合。呢啲方法唔止幫考試，更培養耐性同創新力。
總之，學數學係為終生能力鋪路。我見過學生透過呢啲轉變，變得更有自信。當佢地明白呢啲係他們需要的，對佢地有用的，自然就會肯和主動去學。
