大家好, 我又返黎啦。最近偶爾驀然回首, 回想自己嘅教學生涯, 不知不覺自己已經做左十年嘅補習老師。隨著教學經驗日積月累, 我發現我嘅課堂漸漸唔係教運算, 而係向學生分享自己學習新事物嘅心法。
L同學啱啱黎我度補習M2時候, Core Maths考得非常唔錯, 但係佢測驗喺長期唔合格, 打破左我「Core 考得好, M2 一定考得好」啲偏見。作為一個對教學有熱誠同有強烈好奇心嘅我, 我當然想知點解啦。 每一次我上堂俾難題佢解嘅時候, 佢既口頭禪必然係「可唔可以放棄呀?」
喺呢個時候, 突然一句說話浮現喺我既腦海: 「唔好講I cannot do it, 應該講How can I do it?」 於是我就將呢句「窮爸爸, 富爸爸」既金句鼓勵我既學生, 結果我用左一個學期既時間, 救到佢最近M2 Mid term exam 合格, 實在可喜可賀。
我自己係一個非常鍾意學語言既人。諗返轉頭, 雖然語言同數學既學習方法聽落去係「風馬牛不相及」, 但係其實亦有不少相似之處。例如用法文講數字「79」係 soixante-dix-neuf, 如果囫圇吞棗, 必然覺得舉步維艱。但係如果你知道呢句法文既意思係 60+10+9, 學呢個新詞彚就變得事半功倍啦。M2數學如是, 學生要知道rate of change 基本concept, 先可以理解+識做題目。
教學呢條道路絕對唔係容易行, 但我深信學習係一條通往幸福既道路。我寧願奮鬥到百千次, 才可同學生創出幸福快樂鄉。 祝各位考生心想事成, 成功直入A1 (而唔係A1 Bakery)。
