數學補習老師 – Chester Ng
- 香港中文大學工程學院（榮譽）學士
- GPA曾達4.00/4.00，Maths course 輕取A級 最高成績
- DSE Mathematics Compulsory Part 5**
- 多年DSE數學專科補習經驗，精研DSE數學。擅長短時間內升grade，每年均有學生連升3 grades
我的教學理念:
作為專科數學補習老師，以下我會用少少時間，向你介紹我嘅教學理念。我唔淨係想教你點計數，而係讓你明白，點解你學唔好數。
1. 你唔係唔識，你係唔知
同咁多學生傾過計，我成日都會遇到有人同我講：「Chester，我已經操咗咁多題，點解都係唔識㗎？」我想同你講，好多時候，你唔係「唔識」，你只係「唔知」。
有冇試過啊？最開始望住本書，一頭霧水，唔知要温啲咩；然後老師問你唔識啲咩，其實你都唔知；之後去做題目，好似學過好多技巧，又唔知應該用邊樣；做完份卷啦，又唔知幾時會有careless；最後去到補完習考試前，又唔知點温書好。
你將所有嘅唔知歸納為唔識，但其實你只係未識，而你未識係因為未有人話你知，未有人幫你由「唔知」去到「我知」。
2. 選擇比努力重要
愚公移山嘅故事你聽過無數次；「吾嘗終日而思矣，不如須臾之所學也。」勸學都有講。放返喺數學上面都一樣，你不斷練不斷錯嘅方程爆破同化簡，你身邊嗰個用cal機10秒就搞掂；喺你不斷練啲離地out-syl題嘅時候，你同學已經熟悉曬每課每題每個重心字眼對應嘅考核重點、解題方式，比分位。
與其用錯方向嘅努力去填滿時間，不如揀啱工具同方法，將個腦留返嚟諗真正要諗嘅Concept。
3. 真正嘅「小心」，唔係靠「Check卷」
你有冇俾人鬧過你：「下次唔好咁唔小心」，但明明你就係好小心地犯呢啲唔小心。 好多人都覺得，要解決Careless問題，就係做完要Check卷。但係我認為，淨係靠最後嗰10分鐘嚟搵錯處，係最低效率嘅做法，尤其係做緊啲複雜題目嘅時候。如果你用返同一個思考方法再做一次，你係好容易會喺同一個位再趺多次。
我嘅做法係：「與其靠事後補鑊，不如確保自己第一次就做啱。」 我教學生，喺你落筆嗰吓就已經要開始Check：抄數字、抄座標嘅時候，要口讀心對；將文字題轉做數字嗰陣，即刻Fact Check下自己嘅諗法有冇邏輯問題；盡量用cal，唔好信自己心算；做緊嘅時候要不斷質疑自己：「呢個答案合唔合理㗎？」、「我咁樣假設啱唔啱㗎？」、「呢條題目啲分數係點派㗎？」。
所謂嘅Check卷，其實係應該一邊做一邊Check。咁樣做，你唔單止慳返晒所有做錯要改嘅時間，最緊要係，只有當你「第一次就做啱」，你先係真正根治咗粗心嘅問題。
當然，人人都會錯，所以錯題簿都好重要。人類嘅歷史就係不停重複犯錯，要將你犯過嘅錯變成你嘅PTSD，以後見到類似題目都即刻打醒十二分精神，咁先係減少失誤嘅終極方法。
4. DSE數學，遠未到要講天份嘅程度
你有冇質疑過自己，覺得自己唔夠人哋叻，覺得自己蠢，覺得自己學唔識，覺得自己冇能力爭第一攞5**。我想好坦白咁同你講：DSE數學呢科，真係未去到要鬥IQ嘅地步。
每年500幾個5**，唔通香港學生真係咁多天才咩。你揭開份Past Paper睇下，絕大部份嘅考核重點，都係喺度翻炒再翻炒。呢場係一場努力同方法嘅比拼。只要你肯有系統咁操Past Paper，而且係真係理解每題背後想考你咩核心，而唔係死背答案，你自然會掌握到當中的規律。
我可以好負責任咁同你講，喺DSE數學，淨係靠努力，係絕對有機會攞5**嘅，而我就係living example。
5. 真正盡咗力嘅人，只會覺未夠努力
你有冇講過：「我盡咗力㗎啦」，好多學生口中嘅「盡力」，其實只係「睇落好似好努力」感動自己。攤開本書影張相打卡、坐喺書枱前發呆兩個鐘、做咗少少練習然後獎勵自己，然後話自己好努力，我都經歷過，但千祈唔好話自己盡咗力。
真正嘅盡力，其實係一種好「悶」、好「癲」嘅狀態。你唔會有時間諗「我盡力未㗎？」，因為你已經做到連諗嘅力氣都冇。你只會覺得攰，攰到挨低就瞓著。你唔會周圍同人講「我好努力」，因為你根本冇時間理人點睇。如果你有目標，不如唔好再「努力」啦，趁你仲有機會，嘗試盡力一次啊？
6. 補習，係20%嘅「補」＋80%嘅「習」
補習老師嘅責任，係指引方向、拆解難點、傳授技巧（即係嗰20%嘅「補」），但係真正決定你成績嘅，係你自己嗰80%嘅「習」。
我用十分力去教你，都遠不如你願意用三分力去實踐同內化。我可以教你點射波，但只有你去射個波，個波先會入；亦都只有你不斷練波，先會變準。
如果你準備好正視自己嘅「唔知」，願意用聰明嘅選擇取代盲目嘅努力，而且準備好付出真正嘅汗水，咁就歡迎你加入我嘅課堂。等我哋一齊，將數學變成你入大學嘅武器。
